Oiartzun 2000

Milurteko berriarekin batera Oiartzun Aldizkariak lehengo bidetik jarraitzen du, eta oraindik ere haraneko lehengo eta oraingo gaiak bilduz eta zabalduz dihardu. Aldizkaria argitaratzeko kolaborazio guztiak, beti bezala, altruistak eta funtsezkoak izan dira. Honenbestez urtero saiatzen gara gure txokoan bizi den egoera biltzen eta lortutako emaitza ez da kasualitate kontua, 1975az geroztik egin diren ahaleginen ondorioa baizik. Edizio honetan Maittere Arbide misiolariarekin elkarrizketa egiteko aukera izan dugu, eta misio lurretan egin dituen lanen eta bere bizipen pertsonalen beri eman dugu. Aldizkarian Eugenio Arozenaren izena ere berreskuratu dugu, zeina 1979 urteaz geroztik gure orrietatik kanpo egon baita. Berak egin duen lana, antzerkikoa noski, Oiartzungo gazteei zuzenduta dago. Aurten berezitasun bezala irakurleen arreta Oiartzun argazkietan atalean agertzen diren hiru argazkitan zentratu nahi dugu, izan ere argazki hauek historiko moduan katalogatu baitugu, ondoren agertzen diren arrazoiengatik: a) Peciña botika edo farmaziako argazkia, ez baikenuen ezagutzen bere kokalekua; gaur egun, ordea, badakigu udaletxearen ondoan zegoela, egungo Zamateta etxean. b) Oiartzundik Donostiarako autobusen lehen linea ote da edo Oiartzundik Donostiarako azken diligentzia? c) Oiartzungo auzo gehienak biltzen dituen panoramika; Adolfo Leibarrek 1965ean Urkabe menditik ateratako argazki batzuekin egindako muntaia da. Azkenik, aldizkarian lankide izan genuen Julian Bergaretxeren heriotza gogoratu behar dugu (G.B.)

Oiartzun 1999

Behin berriro ere, hona gatozkizue oiartzuar guztiengana "XANISTEBANAK" direla eta, aurtengo honetan ere bai, nola ez, idazlan guztiak jasotzen dituen gai-multzo zabalaz horniturik, hala gizarte-alorrekoak nola kultura alorrekoak, kolaborazioak bidali dizkiguten guztiei esker. Aurtengoan, berezitasun azpimarragarri batekin, alegia, Xanistebanetarako, OIARTZUN 99 urtekaria argitaratua izango denerako, gure Haranean aldaketa nabarmenak gertatuak izango direlako, Udal osaketaren mailan. Aipatu nahi duguna, nola ez, zera da: Udal Osoko Biltzarraren eraketa berria, horrekin batera, Xabier Iragorri izendatua izan delarik Alkatetzarako, eta Jon Iñarraren agurra, gure Udaletxean 16 urte jarraian lanean aritu ondoren, 4 urte zinegotzi gisa eta hurrengo 12ak Oiartzungo Haraneko Alkate gisa. Oraingo honetan, Jon Iñarrari egin nahi diogu aipamen berezia, urtekaria berari egindako elkarrizketarekin irekitzen badugu ere. Hori guztia, azpimarratu nahi dugulako Oiartzun urtekariak, Jon Iñarrak Alkatetzaren ardura 1987an hartu zuenez geroztik, hartu zuen bultzada eta babesa. Garai hartan, Oiartzun aldizkaria, aldi kritiko batetik irten nahian zebilen, ia ia desagertzear egon zelarik, baina data horretatik aurrera, "Oiartzun" isolaturiko argitalpena izateari utzi zioen, Udalaren Kultura Batzordearen babespea eskuratzeari esker, horrengatik bere askatasuna batere galdu gabe. Eta gaur egun, bere lekua finkatua duen eta oiartzuar guztiek laguntzen duten argitalpena dela esan dezakegu.

Oiartzun 2002

Beste urte bat gehiago! Agudo joan zaigu urtea eta horrelaxe aurkitzen gara, ustekabean, urteroko egin beharrak betetzeko garaia etortzen denean. Urtekaria plazaratzera doa eta nola bildu urte osoko ekintzak hitz labur batzuetan? Orokorrean, izugarrizko abiaduran bizitzen ari garela, esan beharra dago. Gure Oiartzungo herria, gero eta gehiago aldatzen ari da. Azken urte hauetan etxebizitza berri ugari egin dira eta gure Oiartzun ez da lehengo Oiartzun. Iturriotz, Gurutze eta Ergoein auzoak izan ezik, beste auzo guztiak zeharo aldatu dira. Lehen gure herriko erreferentzi nagusiak San Esteban Parrokiko dorrea, Udaletxea eta Aiako Harria izaten ziren, baina azken aldiko Elizalde auzoko eraikuntzak direla eta oso tapatua gelditu da gure udaletxea. Zentzu horretan udaletxeak berak zuen bere handitasun hori begien aurrean galdu egin du. Aiako Harri inguruneak, berriz, bertan egin eta egiten ari diren berreskuratze lanen bidez, asko irabazi du eta irabazten ari da. Lehena Arditurriko bidegorria izan zen, ondoren Arditurriko meategiak berreskuratzeko lanak izan dira eta azkenean, egun hauetan, Aritxulegi gunean zabaldu den Arritxulo aterpea izan da. Azkeneko, eraikuntza hau benetan egitasmo egokia izan dela aitortu beharra dago. Azken finean, herria ondo zaindua dagoelakoan gaude. Udaleko agintariak ikusten ditugu gauzak egiten ari direla, ez daude geldirik; beste gauza bat da, egiten ari diren gauzak hobe egiteko aukerarik badagoen ala ez. 2002ko Xanixtebanak gainean ditugu, euroa ere jadanik menperatu dugu. Heldu diren ekaitz politikoak gainditzeko ez ote gara kapaz izango ?

Oiartzun 2001

Beste behin ere, abiadura ederrean joan da urtea. Badirudi orain egun gutxi aritu ginela aurreko urtekariaren sarrera idazten eta berriro ere lan bera egitea tokatu zaigu. Hala ere, nahiz eta urtea arin joan den, gure herrian aldaketa ugari ikusteko aukera izan dugu. Batez ere, etxegintzari dagokion alorrean, "jo ta fuego" aritu direla esan dezakegu, eta ezta ba bereziki merke daudelako, behinik behin. Jadanik, pausoka-pausoka, baserri kutsua galdu eta industri-hirigintza inguruan kokatzen den giroa sutzen ari da gure herrian. Lehen belarsoro bat besterik ez zen lekuan, orain perretxikoak bezala, etxebizitza ugari eraiki da eta Elizalde eta Ugaldetxo auzoak, ia-ia, bat egiteraino heldu. Arragua, Altzibar, Elizalde eta Karrika auzoek ere aldaketa nabarmenak izan dituzte. Honen ondorio bezala, herriko biztanle kopurua igo egin da eta kanpotik inoiz baino jende gehiago etorri dela aitortu beharra dago; aurpegi ezezagun asko ikusten da behintzat gure herrian asteburuetan. Udaleko agintariak ere, urte osoan zehar ez dira gelditu ere egin eta begi bistan ditugu udaletxean bertan egindako obrak, baita Arraskularre kalean egiten ari direnak, Elizalde-Altzibar bidean etabar. Aurtengo urtekariko pertsonai berezia Oiartzungo herriari oso txertatua dagoen Joxe Remigio Ostolaza Linazasoro dugu. Gainerako atal guztiek Oiartzunen gertatu diren berrien jabe egiteko aukera eskaintzen dute; bere garaian jakin ez genituenak orain ezagutuko ditugu eta bagenikizkienak, aldiz, gogoratu.